2027 ஆம் ஆண்டுக்கான சி.பி.எஸ்.இ வாரியத் தேர்வு அட்டவணை எப்போது வெளியாகும்?

வரவிருக்கும் தேர்வுகளுக்கான கால அட்டவணை இன்னும் வெளியிடப்படாத நிலையிலும், மத்திய இடைநிலைக் கல்வி வாரியம் (CBSE) 2027-ஆம் ஆண்டிற்கான 10 மற்றும் 12-ஆம் வகுப்பு பொதுத் தேர்வுகளுக்கான முன்னேற்பாடுகளைத் தொடங்கியுள்ளது. தேர்வு எழுதவுள்ள மாணவர்களின் விவரங்கள் அடங்கிய ப்ளையிங் ஸ்லிப்களை (flying slips) ஸ்கேன் செய்து பதிவேற்றுவதற்கான ஒப்பந்தப்புள்ளிகளை சி.பி.எஸ்.இ. வாரியம் கோரியுள்ளதுடன், தேர்வெழுதும் மாணவர்களின் தரவுகளை இறுதி செய்யும் பணிகளையும் தொடங்கியுள்ளது.

2027-ஆம் ஆண்டிற்கான தேர்வு கால அட்டவணை எப்போது வெளியிடப்படலாம் என்பது குறித்து, கடந்த ஆண்டு சி.பி.எஸ்.இ பின்பற்றிய காலவரிசை ஒரு குறிப்பை வழங்குகிறது. 2026-ஆம் ஆண்டு பொதுத் தேர்வுகளுக்காக, முதன்முறையாக செப்டம்பர் 24, 2025 அன்று ஒரு தற்காலிக கால அட்டவணையை சி.பி.எஸ்.இ வெளியிட்டது. மாணவர்கள், பள்ளிகள் மற்றும் ஆசிரியர்கள் திட்டமிடுவதற்குப் போதுமான கால அவகாசத்தை வழங்கும் வகையில், தேர்வுகளுக்கு 146 நாட்களுக்கு முன்பாகவே அட்டவணை வெளியிடப்பட்டதாக சி.பி.எஸ்.இ வாரியம் தெரிவித்தது.

தேர்வுகளுக்கு 110 நாட்களுக்கு முன்னதாக, அக்டோபர் 30, 2025 அன்று இறுதி அட்டவணை வெளியிடப்பட்டது. 2026-ஆம் ஆண்டிற்கான 10 மற்றும் 12-ஆம் வகுப்பு பொதுத் தேர்வுகள் பிப்ரவரி 17, 2026 அன்று தொடங்கும் என்று சி.பி.எஸ்.இ ஏற்கனவே அறிவித்திருந்தது. பாடங்களின் சேர்க்கை, நுழைவுத் தேர்வு அட்டவணைகள் மற்றும் தேர்வுத் தாள்களுக்கு இடையே போதுமான இடைவெளி தேவைப்படுவது ஆகிய அம்சங்களும் இறுதி அட்டவணையைத் தயாரிப்பதில் கருத்தில் கொள்ளப்பட்டன.

2027-ஆம் ஆண்டிற்கான தேர்வுகளுக்கு, சி.பி.எஸ்.இ இன்னும் தேர்வு அட்டவணையையோ அல்லது தேர்வு தொடங்கும் தேதியையோ அறிவிக்கவில்லை. கடந்த ஆண்டு பின்பற்றப்பட்ட நடைமுறையை வாரியம் பின்பற்றினால், செப்டம்பர் மாத இறுதியில் தற்காலிக அட்டவணையையும், அதைத் தொடர்ந்து அக்டோபரில் இறுதி அட்டவணையையும் எதிர்பார்க்கலாம். இருப்பினும், இவை முந்தைய சுழற்சியின் அடிப்படையில் அமைந்த அனுமானங்களே தவிர, சி.பி.எஸ்.இ அதிகாரப்பூர்வமாக அறிவித்த தேதிகள் அல்ல.

'இந்தியன் எக்ஸ்பிரஸ்' (Indian Express) செய்தி கூற்றுப் படி , அடுத்த தேர்வுச் சுழற்சிக்கான நிர்வாக ரீதியிலான ஆரம்பக்கட்டப் பணிகளை சி.பி.எஸ்.இ வாரியம் ஏற்கனவே தொடங்கிவிட்டது. இதன் ஒரு பகுதியாக, தேர்வர்களின் பெயர், அடையாள எண், ரோல் எண், தேர்வு மைய எண் மற்றும் பாடக் குறியீடு ஆகியவை அடங்கிய 'ஃப்ளையிங் ஸ்லிப்' (flying slips) எனப்படும் தாள்களை ICR, OCR மற்றும் OMR தொழில்நுட்பங்களைப் பயன்படுத்தி ஸ்கேன் (scan) செய்ய ஒரு முகமையை சி.பி.எஸ்.இ வாரியம் தேடி வருகிறது. இந்தத் தகவல்கள் சி.பி.எஸ்.இ வாரியத்தின் முதன்மைப் பதிவுத் தரவுகளுடன் (admission master) ஒப்பிடப்பட்டு, பிழைகள் அல்லது நகல் பதிவுகள் ஏதேனும் உள்ளனவா என்று சரிபார்க்கப்படும்.

டெண்டர் ஆவணங்களின்படி, 24 மண்டல அலுவலகங்களின் கீழ் 10 மற்றும் 12-ஆம் வகுப்புகளைச் சேர்ந்த சுமார் 29.89 லட்சம் தேர்வர்கள் 2027-28 தேர்வுகளில் பங்கேற்பார்கள் என்று எதிர்பார்க்கப்படுகிறது. தேர்வுகளின் பிரம்மாண்டமான அளவு மற்றும் கையேடு முறையில் (manual processing) செயலாக்கும்போது ஏற்படக்கூடிய பிழைகள் ஆகியவற்றைக் கருத்தில் கொண்டு, தேர்வு தொடர்பான முந்தைய பணிகளை டிஜிட்டல் மயமாக்கும் நடவடிக்கைகள் அதிகரிக்கப்பட்டுள்ளதாக சி.பி.எஸ்.இ வாரியம் தெரிவித்துள்ளது.