நாடு முழுவதும் மூன்றாவது கட்டமாக 93 தொகுதிகளுக்கு நடைபெற்ற மக்களவைத் தேர்தலில் 64 புள்ளி 4 பூஜ்யம் சதவீதம் வாக்குகள் பதிவாகியிருப்பதாக தேர்தல் ஆணையம் தெரிவித்துள்ளது. தேசிய ஜனநாயக கூட்டணி மீதான நம்பிக்கையை மக்கள் வெளிப்படுத்தியிருப்பதாக பிரதமர் நரேந்திர மோடி தெரிவித்துள்ளார்.

நாடு முழுவதும் 543 மக்களவைத் தொகுதிகளுக்கான தேர்தல் 7 கட்டங்களாக நடைபெறுகிறது. ஏற்கனவே இரண்டு கட்ட வாக்குப்பதிவு முடிந்த நிலையில், மூன்றாவது கட்டமாக குஜராத், கர்நாடகா, உத்தரபிரதேசம் உள்ளிட்ட 10 மாநிலங்கள் மற்றும் 2 யூனியன் பிரதேசங்களில் தேர்தல் நடைபெற்றது.

குஜராத் மாநிலம் அஹமதாபாத்தில் உள்ள வாக்குச்சாவடியில் பிரதமர் நரேந்திர மோடி வாக்களித்தார். அகமதாபாத்தில் மத்திய உள்துறை அமைச்சர் அமித் ஷா, அவரது மனைவி மற்றும் மகன் ஜெய் ஷா ஆகியோர் வாக்களித்தனர். கர்நாடக மாநிலம் கலபுர்கியில் காங்கிரஸ் தலைவர் மல்லிகார்ஜுன கார்கே, தனது ஜனநாயகக் கடமையாற்றினார்.கர்நாடக முன்னாள் முதலமைச்சர்களான எடியூரப்பா ஷிவமொக்கா தொகுதியிலும், பசவராஜ் பொம்மை ஹவேரி தொகுதியிலும் வாக்களித்தனர்.

தேசியவாத காங்கிரஸ் கட்சியின் மூத்த தலைவர் சரத் பவார் மற்றும் அவரது மகள் சுப்ரியா சுலே மகாராஷ்டிராவின் பாராமதியில் வாக்களித்தனர்.