இந்தியாவின் வெளிநாட்டு குடிமகன் என்பவர் யார்? ஓ.சி.ஐ என்பவர்கள் யார்?

இந்தியாவின் வெளிநாட்டு குடிமக்கள் (OCI) அட்டை வைத்திருக்கும் பலர் "வெளிநாட்டினர்" என மறுவகைப்படுத்தப்பட்டதாக புகார் அளித்ததை அடுத்து, ஓ.சி.ஐ விதிகளில் எந்த மாற்றமும் செய்யப்படவில்லை என்று வெளியுறவு அமைச்சகம் சனிக்கிழமை (செப்டம்பர் 28) தெரிவித்துள்ளது.

2021 ஆம் ஆண்டு முதல் அரசிதழ் அறிவிப்பின் விதிகள் தொடர்ந்து அமலில் இருப்பதாகவும், "ஓ.சி.ஐ கார்டு வைத்திருப்பவர்களுக்கு சமீப காலங்களில் புதிய மாற்றம் எதுவும் அறிமுகப்படுத்தப்படவில்லை" என்றும் எக்ஸ் பக்கத்தில் நியூயார்க்கில் உள்ள இந்திய துணைத் தூதரகம் தெளிவுப்படுத்தியுள்ளது.

ஓ.சி.ஐ கார்டு என்றால் என்ன?

ஆகஸ்ட் 2005 இல் அறிமுகப்படுத்தப்பட்ட ஓ.சி.ஐ திட்டம், ஜனவரி 26, 1950 அன்று இந்தியக் குடிமக்களாக இருந்த அல்லது அதற்குப் பிறகு அல்லது அந்த தேதியில் இந்தியக் குடிமக்களாகத் தகுதி பெற்ற இந்திய வம்சாவளியைச் சேர்ந்த அனைத்து நபர்களையும் (PIOs) பதிவு செய்ய வழி வகை செய்கிறது. நாடாளுமன்றத்தில் சட்டத்தை தாக்கல் செய்த உள்துறை அமைச்சர் எல்.கே. அத்வானி, புலம்பெயர்ந்த இந்தியர்களுக்கு இரட்டைக் குடியுரிமையை அறிமுகப்படுத்துவதே மசோதாவின் நோக்கம் என்று கூறியிருந்தார்.

ஓ.சி.ஐ கார்டு வைத்திருப்பவர், அதாவது அடிப்படையில் ஒரு வெளிநாட்டு பாஸ்போர்ட் வைத்திருப்பவர் இந்தியாவிற்கு வருவதற்கு பல்நோக்கு வாழ்நாள் விசாவைப் பெறுகிறார், மேலும் எவ்வளவு காலம் வேண்டுமானாலும் இந்தியாவில் தங்குவதற்கு உள்ளூர் காவல்துறை அதிகாரியிடம் பதிவு செய்வதிலிருந்து விலக்கு அளிக்கப்படுகிறது.

மற்றும் அரசாங்க பதிவுகளின்படி, 2023 ஆம் ஆண்டில் 129 நாடுகளில் இருந்து 45 லட்சத்திற்கும் அதிகமான பதிவு செய்யப்பட்ட ஓ.சி.ஐ அட்டை வைத்திருப்பவர்கள் இருந்தனர். 16.8 லட்சத்துக்கும் அதிகமான ஓ.சி.ஐ கார்டு வைத்திருப்பவர்களுடன் அமெரிக்கா முதலிடத்திலும், இங்கிலாந்து (9.34 லட்சம்), ஆஸ்திரேலியா (4.94 லட்சம்) மற்றும் கனடா (4.18 லட்சம்) அடுத்தடுத்த இடங்களிலும் உள்ளன.

ஆரம்பத்தில், ஓ.சி.ஐ கார்டு வைத்திருப்பவர், விவசாயம் அல்லது தோட்ட சொத்துக்களை கையகப்படுத்துவது தொடர்பான விஷயங்களைத் தவிர, பொருளாதாரம், நிதி மற்றும் கல்வித் துறைகளில் வசதிகளைப் பெறுவது தொடர்பாக, வெளிநாடு வாழ் இந்தியர்களுடன் (NRI) பொதுவான சமத்துவத்தைப் பெறுவதற்கு உரிமையுடையவர். என்.ஆர்.ஐ.க்கள் இந்திய குடிமக்கள், அவர்கள் வெளி நாட்டில் நிரந்தரமாக வசிப்பவர்கள்.

ஓ.சி.ஐ.,க்கள் தொடர்பான சமீபத்திய விதிகள் என்ன?

மார்ச் 4, 2021 அன்று, உள்துறை அமைச்சகம் ஓ.சி.ஐ கார்டு வைத்திருப்பவர்கள் தொடர்பான விதிகளில் திருத்தம் செய்து அரசிதழ் அறிவிப்பை வெளியிட்டது. அவை அப்படியே தொடர்கின்றன.
இந்த விதிகள் ஓ.சி.ஐ கார்டு வைத்திருப்பவர்கள் இந்தியாவில் உள்ள பாதுகாக்கப்பட்ட பகுதிகளைப் பார்வையிட அனுமதி பெற வேண்டும். ஜம்மு & காஷ்மீர் மற்றும் அருணாச்சல பிரதேசத்திற்குச் செல்லும் வெளிநாட்டினருக்கும் இதே கட்டுப்பாடுகள் பொருந்தும்.

"எந்தவொரு ஆராய்ச்சியையும்" மேற்கொள்வதற்கு, எந்தவொரு "மிஷனரி" அல்லது "தப்லிகி" அல்லது "பத்திரிகை நடவடிக்கைகளை" மேற்கொள்வதற்கும் அல்லது இந்தியாவில் "பாதுகாக்கப்பட்ட", "கட்டுப்படுத்தப்பட்ட" அல்லது "தடைசெய்யப்பட்ட" என்று அறிவிக்கப்பட்ட எந்தப் பகுதிக்கும் செல்வதற்கும் ஓ.சி.ஐ.,க்கள் சிறப்பு அனுமதியைப் பெறுவதற்கான தேவை உட்பட, புதிய கட்டுப்பாடுகளின் தொடர் அறிமுகப்படுத்தப்பட்டது. 

 ஃபெமாவின் கீழ் இந்திய ரிசர்வ் வங்கியின் கடந்த சுற்றறிக்கைகள் தொடர்ந்த போதிலும், அன்னிய செலாவணி மேலாண்மைச் சட்டம், 2003 இன் நோக்கங்களுக்காக, "அனைத்து பொருளாதார, நிதி மற்றும் கல்வித் துறைகளிலும்" ஓ.சி.ஐ.,க்களை "வெளிநாட்டு குடிமக்களுக்கு" இணையாக அறிவித்தது. இது அவர்களின் பொருளாதார, நிதி மற்றும் கல்வி உரிமைகளின் நோக்கங்களுக்காக ஓ.சி.ஐ.,களை என்.ஆர்.ஐ.,களுக்கு சமமான நிலைக்கு மாற்றியது.

ஓ.சி.ஐ விதிகளில் செய்யப்பட்ட முதல் மாற்றமா இது?

2021 அறிவிப்பு ஏப்ரல் 11, 2005, ஜனவரி 5, 2007 மற்றும் ஜனவரி 5, 2009 ஆகிய தேதிகளில் வெளியிடப்பட்ட மூன்று முந்தைய அறிவிப்புகளுக்கு பிறகு வந்துள்ளது, இவை ஓ.சி.ஐ.,களின் உரிமைகளை வகுத்தன.

ஏப்ரல் 11, 2005, ஆணை ஓ.சி.ஐ.,களுக்கு பல-நுழைவு வாழ்நாள் விசாக்களை செயல்படுத்தியது, மேலும் எந்த நேரத்திலும் FRRO பதிவிலிருந்து விலக்கு, மற்றும் விவசாய மற்றும் தோட்ட சொத்துக்கள் தவிர பொருளாதார, கல்வி மற்றும் நிதி துறைகள் தொடர்பாக அனைத்து வசதிகளிலும் என்.ஆர்.ஐ.,களுடன் சமமாக கருதப்படுவர் என்று வகுத்தது.

ஜனவரி 6, 2007 இல், சில புதிய உட்பிரிவுகள் ஓ.சி.ஐ.,களை நாட்டிற்கு இடையேயான தத்தெடுப்பு தொடர்பாக என்.ஆர்.ஐ.,களுக்கு இணையாக, உள்நாட்டுத் துறைகளில் விமானக் கட்டணத்தில் இந்தியக் குடிமக்களுக்கு இணையாக நடத்தப்பட அனுமதித்தது, மேலும் வனவிலங்கு சரணாலயங்கள் மற்றும் பூங்காக்களில் உள்நாட்டுப் பார்வையாளர்களுக்கான அதே நுழைவுக் கட்டணமும் அனுமதிக்கப்பட்டது.

ஜனவரி 2009 இல் செய்யப்பட்ட மற்றொரு திருத்தங்கள், நினைவுச்சின்னங்கள் மற்றும் வரலாற்றுத் தளங்கள், அருங்காட்சியகங்களில் நுழைவுக் கட்டணத்தைப் பொறுத்து என்.ஆர்.ஐ.,களுடன் ஓ.சி.ஐ.,க்கள் சமமாக இருக்க அனுமதித்தது; டாக்டர்கள், சி.ஏ.,க்கள், வழக்கறிஞர்கள் மற்றும் கட்டிடக் கலைஞர்கள் போன்ற தொழில்களில் என்.ஆர்.ஐ.,களுடன் சமத்துவம்; மற்றும் அனைத்திந்திய பி.எம்.டி (PMT) அல்லது இது போன்ற பிற சோதனைகளில் கலந்து கொள்வதற்கு என்.ஆர்.ஐ.,களுடன் சமத்துவம்.

யார் ஓ.சி.ஐ ஆக முடியாது? மற்றும் ஓ.சி.ஐ.,க்கள் என்ன செய்ய அனுமதிக்கப்படவில்லை?

ஒரு விண்ணப்பதாரரின் பெற்றோர் அல்லது தாத்தா பாட்டி பாகிஸ்தான் அல்லது பங்களாதேஷின் குடிமகனாக இருந்திருந்தால், அவர் ஓ.சி.ஐ கார்டைப் பெறத் தகுதியற்றவர். எவ்வாறாயினும், இந்தியக் குடிமகனின் வெளிநாட்டு வம்சாவளியின் மனைவி அல்லது ஓ.சி.ஐ.,யின் வெளிநாட்டு வம்சாவளியின் மனைவி, திருமணம் பதிவு செய்யப்பட்டு இரண்டு ஆண்டுகளுக்குக் குறையாமல் வாழ்ந்திருந்தால், ஓ.சி.ஐ கார்டுக்கு விண்ணப்பிக்கலாம். சேவையில் இருக்கும் அல்லது ஓய்வு பெற்ற வெளிநாட்டு ராணுவ வீரர்களும் ஓ.சி.ஐ மானியத்திற்கு தகுதியற்றவர்கள்.

ஓ.சி.ஐ கார்டு வைத்திருப்பவருக்கு வாக்களிக்க உரிமை இல்லை; ஒரு சட்டமன்றம் அல்லது ஒரு சட்டமன்ற கவுன்சில் அல்லது பாராளுமன்றத்தின் உறுப்பினராக இருக்க முடியாது; குடியரசுத் தலைவர், துணைக் குடியரசுத் தலைவர், உச்ச நீதிமன்றம் அல்லது உயர் நீதிமன்ற நீதிபதி போன்ற இந்திய அரசியலமைப்புப் பதவிகளை வகிக்க முடியாது. அவர் சாதாரணமாக அரசாங்கத்தில் வேலை செய்ய முடியாது.