தமிழகத்தில் காலாண்டுத் தேர்வு தேதி அறிவிப்பு ..!! எப்போது?
காலாண்டுத் தேர்வுகள் நடைபெறும் தேதிகள் அறிவிப்பு; பள்ளி மாணவர்களுக்கு விடுமுறை எத்தனை நாட்கள் தெரியுமா?
தமிழகத்தில் பள்ளி மாணவர்களுக்கான காலாண்டுத் தேர்வு செப்டம்பர் 20 ஆம் தேதி முதல் தொடங்கும் என்று தெரிவிக்கப்பட்டுள்ளது.
தமிழகத்தில் 2024-2025 ஆம் கல்வியாண்டுக்கான காலாண்டு தேர்வுகள் செப்டம்பர் மாதம் நடக்கவுள்ளது. ஒன்றாம் வகுப்பு முதல் பன்னிரெண்டாம் வகுப்பு வரை உள்ள மாணவர்களுக்கு காலாண்டுத் தேர்வு நடைபெறும்.
முதல் காலாண்டில் நடத்தப்பட்ட பாடங்களில் இருந்து இந்தத் தேர்வுக்கான வினாத்தாள்கள் தயாரிக்கப்படும். இந்தப் பணிகளுக்காக நியமிக்கப்பட்ட ஆசிரியர் குழு வினாத்தாள்களை தயார் செய்யும். இதற்கான ஏற்பாடுகள் ஒவ்வொரு மாவட்ட அளவிலும் மேற்கொள்ளப்படும்.
தேவையான எண்ணிக்கையில் வினாத்தாள்கள் தயார் செய்யப்பட்டு, அரசுப் பள்ளிகள், அரசு உதவிப்பெறும் பள்ளிகள், தனியார்களுக்கு விநியோகம் செய்யப்படும்.
பள்ளிக்கல்வித் துறை வெளியிட்டுள்ள அட்டவணையின்படி காலாண்டு தேர்வுகள் செப்டம்பர் 20 ஆம் தேதி தொடங்கி செப்டம்பர் 28 ஆம் தேதி வரை நடைபெறுகிறது.
இதனையடுத்து அக்டோபர் 3 ஆம் தேதி இரண்டாம் பருவத்திற்கான வகுப்புகள் தொடங்குகிறது. அந்த வகையில் பார்த்தால் இந்த ஆண்டு காலாண்டு விடுமுறை நான்கு நாட்கள் மட்டுமே இருக்கும்.
அவற்றிலும் செப்டம்பர் 29 ஆம் தேதி ஞாயிற்றுக்கிழமை, அக்டோபர் 2 ஆம் தேதி காந்தி ஜெயந்தி அரசு விடுமுறை என்பதால், 2 நாட்கள் மட்டுமே காலாண்டு விடுமுறை வருகிறது என்பது குறிப்பிடத்தக்கது.