நீட் தேர்வே ஒரு மோசடிதான் என்று அனல் பறக்க பேசிய முதல்வர் ஸ்டாலின் ...

 நீட் தேர்வே ஒரு மோசடியான விஷயம்தான்; அதற்கு நாம் ஒரு முடிவு கட்டியே ஆக வேண்டும் என்று முதல்வர் மு.க. ஸ்டாலின் தெரிவித்துள்ளார்.

தொடர்ந்து பேசிய அவர் , தமிழ்நாட்டில் திமுக ஆட்சி அமைந்த அடுத்த கணமே, நீட் தேர்வு ரத்து செய்யப்படும் என வாக்குறுதி அளிக்கப்பட்டு இருந்தது. அதன்படி, கடந்த 2021 சட்டமன்றத் தேர்தலில் வெற்றி பெற்று ஆட்சியமைத்த போதிலும், நீட் தேர்வை தமிழக அரசு ரத்து செய்யவில்லை. இதனை சுட்டிக்காட்டி, திமுகவை எதிர்க்கட்சிகள் விமர்சித்து வந்தன. அதற்கு பதிலளித்த திமுக தலைவர்கள் மத்தியில் ,காங்கிரஸ் தலைமையில் கூட்டணி ஆட்சி அமைந்தால் மட்டுமே நீட் தேர்வை ரத்து செய்வது சாத்தியம் என ஒரேயடியாக தெரிவித்துவிட்டனர்.

இதனிடையே, தற்போது நடந்து முடிந்த நாடாளுமன்றத் தேர்தலிலும் பாஜக கூட்டணிதான் மத்தியில் ஆட்சி அமைத்திருக்கிறது. எனவே, இந்த முறையும் நீட் தேர்வை தமிழகத்தில் ரத்து செய்ய முடியாது என்பது தெளிவாகியுள்ளது. இருந்தபோதிலும், தமிழகத்தில் மொத்தமுள்ள 39 மக்களவைத் தொகுதிகளையும் திமுக கைப்பற்றியுள்ளதால், நாடாளுமன்றத்தில் நீட் தேர்வை ரத்து செய்ய மத்திய அரசுக்கு கடுமையாக அழுத்தம் கொடுக்க வேண்டும் என்று தங்கள் நாடாளுமன்ற உறுப்பினர்களுக்கு முதல்வர் மு.க. ஸ்டாலின் உத்தரவிட்டுள்ளார்.

இந்நிலையில், தமிழக கல்வித்துறை சார்பில் சென்னையில் ஐம்பெரும் விழா இன்று நடைபெற்றது. விழாவுக்கு தலைமை வகித்து முதல்வர் ஸ்டாலின் பேசியதாவது:

பள்ளிகளில் பயிலும் மாணவ செல்வங்களாகிய நீங்கள் ஒவ்வொருவரும் , ஒன்றை மட்டும் மனதில் வைத்துக் கொள்ள வேண்டும். உங்களிடம் இருந்து எதை வேண்டுமானாலும் பகைவர்கள் திருடிவிட முடியும். ஆனால், நீங்கள் கற்ற கல்வியை எவராலும் திருட முடியாது. உங்களை யார் கைவிட்டாலும், உங்களின் கல்வி உங்களை எப்பொழுதும்  கைவிடாது என்பதை நினைவில் வைத்துக்  கொள்ளுங்கள் . இது ஏதோ அறிவுரையாக எண்ணிவிட வேண்டாம். இது வாழ்க்கையின்  உண்மை.

இதிலும் மிகவும் வருத்தமான விஷயம் என்னவென்றால், அந்தக் கல்வியையே இன்று சிலர் மோசடியாக மாற்றிவிட்டார்கள். நீட் தேர்வும் அதுபோன்ற மோசடிதான். நீட் தேர்வை மோசடி என்று முதன்முதலில் கூறிய மாநிலமே தமிழ்நாடு தான். அதை கூறியது திமுக தான். திமுக அன்று சொன்னது இன்று நிரூபணமாகி வருகிறது. எனவே, இந்த மோசடியான நீட் தேர்வுக்கு நாம் முடிவு கட்டியே தீர வேண்டும் என முதல்வர் ஸ்டாலின் பேசினார்.