தமிழகத்தில் பள்ளிகள் திறப்பு தேதி.. கோடை விடுமுறை எப்போது முடிகிறது?

கோடை விடுமுறை முடிந்து மீண்டும் பள்ளிகள் திறக்கப்படும் தேதி குறித்து பெற்றோர்கள் மிகுந்த ஆர்வத்துடன் எதிர்பார்த்து காத்திருக்கும் நிலையில், பள்ளிக் கல்வித்துறை முக்கியமான ஆலோசனைக்கு தயாராகி வருகிறது. அதன்படி, இன்னும் ஐந்து நாட்களில் முக்கிய அறிவிப்பு வெளியாகும் என்று தகவல்கள் வெளியாகியுள்ளன.

2023-24ஆம் கல்வியாண்டை பொறுத்தவரை 6 முதல் 12ஆம் வகுப்பு மாணவர்களுக்கு ஜூன் 12ஆம் தேதியும், ஒன்று முதல் ஐந்தாம் வகுப்பு மாணவர்களுக்கு ஜூன் 14ஆம் தேதியும் பள்ளிகள் திறக்கப்பட்டன. இதேபோல் வரும் 2024-25ஆம் கல்வியாண்டிலும் வெயிலின் தாக்கத்தை பொறுத்து பள்ளிகள் திறப்பு தேதி முடிவு செய்யப்படும். மே மாத தொடக்கத்தில் வெயில் வாட்டி வதைத்தது. பல மாவட்டங்களில் 100 டிகிரிக்கும் மேல் வெப்பநிலை பதிவானது. இதனால் ஹீட் ஸ்ட்ரோக் அபாயங்களும் ஏற்பட்டன.

இதை வைத்து ஜூன் 2வது, 3வது வாரத்திற்கு பள்ளிகள் திறப்பு தள்ளிப் போய்விடும் என்று பலரும் கணக்கு போட்டனர். ஆனால் கடந்த ஒருவார காலமாக தமிழகம் முழுவதும் நல்ல மழை பெய்து வருகிறது. சாலைகளில் மழைநீர் பெருக்கெடுத்து ஓடும் அளவிற்கு நிலைமை மாறியுள்ளது. தற்போதைய சூழலில் வெயிலின் தாக்கம் பெரிதாக இல்லை என்பது தான் கவனிக்கத்தக்கது. மேலும் வளிமண்டல கீழடுக்கு சுழற்சி காரணமாக தமிழகம் முழுவதும் நல்ல மழை பெய்து வருகிறது.

இந்திய வானிலை ஆய்வு மையத்தின் சமீபத்திய அறிவிப்பின் படி, வரும் 27ஆம் தேதி வரை தமிழகத்தின் ஒருசில இடங்களில் லேசானது முதல் மிதமானது வரை மழை பெய்யக்கூடும். சென்னையை பொறுத்தவரை வானம் ஓரளவு மேகமூட்டத்துடன் காணப்படும் என்று தெரிவிக்கப்பட்டுள்ளது. எனவே மே கடைசி வாரத்தில் வானிலை நிலவரத்தை பொறுத்து தான் பள்ளிகள் திறப்பை முடிவு செய்ய முடியும்.

கர்நாடகா மாநிலத்தில் மே 29ஆம் தேதியே பள்ளிகளை திறக்க முடிவு செய்யப்பட்டுள்ளது. இந்நிலையில் வரும் 27ஆம் தேதி திங்கள் அன்று பள்ளிக் கல்வித்துறை சார்பில் ஆலோசனை கூட்டம் நடத்தப்படவுள்ளதாக தெரிவிக்கப்பட்டுள்ளது. இதில் ஜூன் மாதம் எந்த தேதியில் பள்ளிகளை திறக்கலாம் என்று முடிவு செய்யப்படும். மேலும் பள்ளிகள் திறப்பை ஒட்டி மேற்கொள்ள வேண்டிய முன்னேற்பாடுகள் பற்றியும் ஆலோசித்து உரிய நடவடிக்கைகளை முடுக்கி விடுவர்.