அரசு பள்ளி ஆசிரியர்கள் பொது மாறுதல்... இன்னும் 2 நாட்கள் தான்... கவுன்சிலிங் தேதி குறிக்கும் தமிழக அரசு!

தமிழக அரசின் பள்ளிக் கல்வித்துறை சார்பில் ஆண்டுதோறும் அரசு பள்ளி ஆசிரியர்களுக்கு பொது மாறுதல் கலந்தாய்வு நடத்தப்படுகிறது. அந்த வகையில் நடப்பாண்டிற்கான ஏற்பாடுகள் முடுக்கி விடப்பட்டுள்ளன. கடந்த 13ஆம் தேதி முதல் பொது மாறுதல் கலந்தாய்விற்கு விண்ணப்பிக்கலாம் என்று அறிவிப்பு வெளியானது.

பொது மாறுதல் கலந்தாய்வு

இதையடுத்து ஆசிரியர்கள் பலரும் ஆர்வத்துடன் விண்ணப்பித்து வருகின்றனர். ஒவ்வொரு ஆசிரியருக்கும் 8 இலக்க எமிஸ் ஐடி (EMIS ID) வழங்கப்பட்டிருக்கும். இதைக் கொண்டு விண்ணப்பிக்க வேண்டும். முதலில் emis.tnschools.gov.in என்ற இணையதளத்திற்குள் செல்ல வேண்டும். இதற்காக எமிஸ் ஐடி மற்றும் பாஸ்வேர்டை பதிவிட வேண்டும். உள்ளே சென்றதும் அட்மின் ஆப்ஷனை தேர்வு செய்து மாறுதலுக்கான Transfer Application Form-ஐ கிளிக் செய்ய வேண்டும்.

இதையடுத்து வரும் புதிய பக்கத்தில் எந்த வகையான ஆசிரியர், ஆசிரியரின் பெயர், பிறந்த நாள், கைபேசி எண், பாடம், பணிபுரியும் பள்ளி, அடையாள எண், பதவியின் பெயர், பணியில் சேர்ந்த நாள் உள்ளிட்ட விவரங்களை சமர்பிக்க வேண்டும். இதுதவிர மாறுதலில் முன்னுரிமை தேவையா? என்பதை தேர்வு செய்ய வேண்டும்.

அரசு அல்லது தனியார் மருத்துவரால் வழங்கப்பட்ட மருத்துவ ஆவணத்தை பதிவேற்ற வேண்டும். சிறப்பு முன்னுரிமை வேண்டுமா? அதில் எந்த வகை? போன்ற விவரங்களை தேர்வு செய்யவும். இவை அனைத்தையும் பதிவிட்டு கடைசியாக Submit பட்டனை கிளிக் செய்தால் பொது மாறுதல் கலந்தாய்விற்கு விண்ணப்பித்து விடலாம். வரும் 17ஆம் தேதி வரை கால அவகாசம் அளிக்கப்பட்டுள்ளது. எனவே இன்னும் இரண்டு நாட்கள் மட்டுமே எஞ்சியிருக்கின்றன.

இதுவரை 13,484 ஆசிரியர்கள் விண்ணப்பம் செய்துள்ளதாக தகவல்கள் தெரிவிக்கின்றன. இதில் இரண்டு முக்கியமான விஷயங்கள் இருக்கின்றன. தொடக்கக் கல்வி இயக்ககம் சார்ந்த விண்ணப்பங்கள் என்றால் வட்டாரக் கல்வி அலுவலர்கள் ஆவணங்களை சரிபார்த்து ஒப்புதல் அளிப்பார். பின்னர் மாவட்ட கல்வி அலுவலருக்கு (தொடக்கக் கல்வி) இணைய வழியாக சமர்பிப்பார்.

அதுவே பள்ளிக் கல்வி இயக்கம் சார்ந்த விண்ணப்பங்கள் என்றால் உயர்நிலைப் பள்ளி அல்லது மேல்நிலைப் பள்ளி தலைமை ஆசிரியர்கள் சரிபார்த்து ஒப்புதல் அளிப்பர். பின்னர் மாவட்ட கல்வி அலுவலருக்கு (இடைநிலைக் கல்வி) இணைய வழியாக சமர்பிப்பார். கலந்தாய்வு நடைபெறும் தேதி குறித்து விரைவில் அதிகாரப்பூர்வ அறிவிப்பு வெளியாகும் என்று பள்ளிக் கல்வித்துறை சார்பில் தெரிவிக்கப்பட்டுள்ளது.